Mu rwego rwo kurushaho gukangurira abaturage guhindura imyumvire mu Kwimakaza Umuco w'Isuku, kuri uyu wa Kabiri tariki ya 09 Werurwe 2022, mu Karere ka Musanze hatangirijwe Icyumweru Cyahariwe Isuku n'Isukura mu Ntara y'Amajyaruguru, gahunda izajya iba inshuro imwe mu Cyumweru muri iyi Ntara.

Ubu bukangurambaga bwakorewe mu Murenge wa Kinigi, mu Kagari ka Nyonirima, ahari hahuriye Imidugudu itatu, uwa Butorwa ya II, Gahisi na  Kansoro, muri Santere izwi nko Kukazu, hafi y'Ibiro bya RDB.

Bwatangijwe ku mugaragaro na Guverineri w'Intara y'Amajyaruguru, Madamu NYIRARUGERO Dancille, wari kumwe n'Umuyobozi w'Akarere ka Musanze, Bwana RAMULI Janvier, Umuyobozi w'Akarere Wungirije Ushinzwe Imibereho Myiza y'Abaturage, Inzego z'Umutekano, Umuyobozi wa RDB mu Karere na bamwe mu Bakozi ku Ntara no ku Karere.  Bakiriwe n’Umunyamabanga Nshingwabikorwa w’Umurenge. Uretse abaturage bo muri iyo Midugdu yavuzwe haruguru kandi, bwanitabiriwe n’Abakozi ba RDB batwaza ba Mukerarugendo imizigo, aba Porteurs n’Abamotari.

Muri iyi gahunda, hakozwe umuganda ku muhanda w’itaka ujya muri Pariki y'Ibirunga n'isuku muri zimwe mu ngo zo muri iyo Santere, by'umwihariko k'uwitwa NYIRANGERAGEZE Asnathe wo mu Mudugudu wa Gahisi, ukwiriye kwegerwa kurusha abandi.

Nyuma y'umuganda, hatanzwe ubutumwa bushimira abari bitariye hanagarukwa ku mpamvu nyamukuru y'ubu bukangurambaga muri rusange no kuba bwatangirijwe mu Karere ka Musanze, mu Murenge wa Kinigi by’umwihariko, aho bibukijwe ko hakenewe isuku yihariye nk’uko naho ari mu Gice Cytihariye, indorerwamo y’Igihugu cyacu, nk’Igicumbi cy’Ubukerarugendo.

Umunyamabanga Nshingwabikorwa w'Umurenge n'abaturage bashimira abaje kubaha umuganda

Umuyobozi w'Akarere atanga impanuro, mu izina rya Guverineri utari washoboye gukomezanya nabo, no mu izina ry'Akarere

Basabwe kuba bandebereho mu kugira isuku ku mubiri, ku myambaro, mu rugo, aho batuye, aho bagenda, bakorera, basengera, aho bari hose, hagamijwe kwiyubakira u Rwanda ruzira umwanda, Komite Nyobozi z'Imidugudu zikaba zasabwe gushyiraho gahunda yo kugenzura isuku mu ngo.

Ubu butumwa bukaba bwanunganiwe n'ubwari bwanditswe bwari bwmanitswe muri Santere y'aho ndetse n'indangururamajwi igendanwa yazengurukaga mu bice bitandukanye.

Iki gikorwa kikaba cyishimiwe n'abashyitsi n'abasangwa.