Kuri uyu wa Gatanu Tariki 1 Nzeri 2023, mu Murenge wa Kinigi kuri Kwita Izina Site  habereye  Ibirori byo Kwita Izina Abana b' Ingagi ku nshuro ya 19. Muri uyu muhango, Umushyitsi Mukuru yari First Lady   Madamu Jeannette Kagame. Insanganyamatsiko y' uyu mwaka iragira iti   Conservation is Life ikaba igamije gushishikariza abantu bose kubungabunga Urusobe rw' Ibinyabuzima no kwita ku bidukikije. 

Muri ibi birori, Abana b’ Ingagi 23 nibo bahawe  Amazina. Uyu muhango ukaba  witabiriwe n' Abayobozi mu nzego zitandukanye barimo; Abaminisitiri, Umuyobozi wa RDB Madamu  Clare Akamanzi , Guverineri w' Intara y' Amajyaruguru Bwana  Mugabowagahunde Maurice, Abayobozi n' Abakozi b' Akarere  ka Musanze mu nzego zitandukanye  barangajwe imbere n' Umuyobozi wako w' Agateganyo Bwana Hamiss Bizimana n' Umunyamabanga Nshingwabikorwa w' Akarere Bwana Alex Kanayoge  , Abasenateri, Abadepite, Abahagarariye Ibihugu  byabo mu Rwanda n' Imiryango Mpuzamahanga, abashyitsi baturutse mu mpande zitandukanye z' isi , Urubyiruko n' abaturage muri rusange.

Amazina yahawe abana b' Ingagi ni aya akurikira; Bigwi, Ingoboka, Intiganda, Aguka, Umutako, Ikirango, Ramba, Inganzo, Urunana, Inshingano, Impundu, Gisubizo, Intarumikwa, Nibagwire, Jijuka, Narame, Mukundwa, Umucunguzi, Turumwe, Mugisha, Uburinganire, Murare na Gakondo.

Mu ijambo yagejeje ku bitabiriye uyu muhango, First Lady Madamu Jeannette Kagame yongeye gushishikariza abaturage kumenyera kubana neza n' urusobe rw' ibinyabuzima kuko bigira uruhare runini mu mibereho myiza y' ikiremwamuntu. Yasabye urubyiruko by' Umwihariko gukomeza umutima wo gukunda Igihugu no kugikorera ndetse no kurinda ibidukikije mu rwego rwo guharanira imibereho myiza ndetse n' iterambere mu bukungu.