Kuri uyu wa kane tariki ya 2 Ukuboza 2021, i Musanze habereye ibiganiro byateguwe n'Urwego rw'Umuvunyi bigenewe abagize Inama Ngishwanama zo gukumira no kurwanya akarengane na ruswa mu Turere tugize Intara y'Anajyaruguru.

Ibi biganiro byateguwe mu rwego rw'icyumweru cyahariwe kurwanya ruswa, kibanziriza kwizihiza Umunsi Mpuzamahanga wo kurwanya ruswa, uzizihizwa ku itariki ya 09 Ukuboza 2021, hazirikanwa insanganyamatsiko igira iti, "Kurandura ruswa, inkingi y'iterambere rirambye".

Ibi biganiro byitabiriwe n'Abayobozi batandukanye, barimo Guverineri w'Intara y'Amajyaruguru, Madamu Nyirarugero Dancille, Umuvunyi Wungirije ushinzwe gukumira no kurwanya akarengane, Madamu Yankurije Odette, Komiseri muri Komisiyo y'Igihugu y'Uburenganzira bwa Muntu, Madamu Gahongayire Aurélie, Depite mu Nteko ishinga  Amategeko y'u Rwanda uhagarariye Ihuriro ry'Inteko Nyafurika zishinga Amategeko, rishinzwe kurwanya ruswa, Inzego z'Umutekano ku rwego rw'Intara, Abayobozi b'Uturere tugize Intara y'Amajyaruguru ndetse n'abagize Inama Ngishwanama zo gukumira no kurwanya akarengane na ruswa mu turere tugize iyi Ntara.