Kuri uyu wa kane tarikiya 5 Kamena 2025, i Musanze hateraniye inama nyunguranabitekerezo ku iterambere ry'Intara y'Amajyaruguru yayobowe na Guverineri Mugabowagahunde Maurice. Abateraniye muri iyi nama barebeye hamwe uko Intara y’Amajyaruguru ihagaze mu bukungu, mu mibereho myiza n'imiyoborere myiza ari nako bafatira hamwe ingamba zo kurushaho kwihutisha iterambere rirambye kandi ridaheza.

Atangiza iyi nama, Guverineri Mugabowagahunde Maurice yagaragaje ko iyi Ntara ihagaze neza mu bipimo bitandukanye, birimo umutekano mwiza, ubuhinzi butanga umusaruro mwiza kandi uhagije, ibikorwaremezo bitandukanye byubatswe mu turere twose tugize iyi ntara, gufasha abaturage kwivana mu bukene, n’ibindi. Yagaragaje kandi ko abayobozi badakwiye kwirara kuko hakiri ibibazo bigomba gukemurwa. Aha ni ho yahereye abasaba kungera imbaraga mu gukemura ibibazo bikibangamiye imibereho myiza y’abaturage birimo: Isuku nke, Igwingira n'imirire mibi, Imiryango idafite amacumbi, n’Abana bata ishuri,

Abitabiriye iyi nama bagejejweho ibiganiro bitandukanye bibagaragariza uko Intara y’Amajyaruguru ihagaze mu bipimo bitandukanye bijyanye n'umutekano, ubukungu, imibereho myiza n'imiyoborere myiza ari na ko bagaragarizwa ibibazo bihari n'uruhare rwabo mu kubikemura. Bafashe umwanya batanga ibitekerezo bitandukanye biganisha ku kwihutisha iterambere ry’Intara y’Amajyaruguru, bakemura ibibazo bitandukanye bikigaragara muri iyi Ntara.

Iyi nama yahurije hamwe abagize komiti nyobozi z’Uturere tugize inatara y’Amajyaruguru, abagize Biro Njyanama muri buri Karere, abanyamabanga Nshingwabikorwa b’Uturere n’Imiringe, inzego z’umutekano , umunyamabanga Nshingwabikorwa w’Akagari umwe muri buri Karere, Umukuru w’Umudugudu umwe muri buri Karere, abahagarariye urubyiruko, abagore, abafite ubumuga, n’abandi bafatanyabikorwa mu iterambere.