Kuri iki cyumweru tariki ya 12 Mata 2026, ku Rwibutso rw’Akarere rwa Cour d’Appel de Ruhengeri, habereye igikorwa cyo Kwibuka ku nshuro ya 32 abari abakozi b’Amakomine yahujwe akabyara Akarere ka Musanze bazize Jenoside yakorewe Abatutsi mu 1994.

Iki gikorwa cyitabiriwe n’abayobozi batandukanye, barangajwe imbere na Guverineri w’Intara y’Amajyaruguru, Bwana Mugabowagahunde Maurice, kikava cyabimburiwe no gushyira indabo ku mva rusange no kunamira inzirakarengane zazize Jenoside yakorewe Abatutsi, mu rwego rwo kubasubiza agaciro bambuwe no kuzirikana ubuzima bwabo.

Mu butumwa bwe, Guverineri Mugabowagahunde Maurice yihanganishije abarokotse Jenoside yakorewe Abatutsi, asaba abayobozi kurushaho kubumbatira ubumwe bw’abo bayoboye, kumenya neza ibibazo n’ibyifuzo by’abaturage no kubikemura ku gihe. Yabibukije kandi kwitandukanya n’imyitwarire y’abayobozi babi bagize uruhare mu iyicwa ry’abakozi bari bashinzwe kuyobora, ashimangira ko ubuyobozi bwiza ari inkingi y’iterambere n’umutekano w’igihugu.

Mu ijambo ry’ikaze, Umuyobozi w’Akarere ka Musanze, Bwana Nsengimana Claudien, yihanganishije abarokotse Jenoside, agaragaza ko kwibuka aba bakozi ari uguha agaciro ubuzima bwabo no kurinda ko amateka yacu yazima cyangwa akagorekwa.

Yavuze ko aba bakozi bakoreraga amakomini yari agize icyahoze ari Perefegitura ya Ruhengeri, bishwe bazira gusa uko baremwe, atari uko bakoze amakosa cyangwa ko bari abakozi babi, ahubwo ari uko bari Abatutsi.

Ku ruhande rw’imiryango iharanira inyungu z’abarokotse Jenoside, Perezida wa Ibuka mu Karere ka Musanze, Bwana Twizere Rusisiro Festus, yashimye Inkotanyi zahagaritse Jenoside, anasaba abakozi n’abaturage muri rusange kurangwa n’ubutwari, ukuri n’ubunyangamugayo. Yongeyeho ko ari ngombwa gutanga amakuru ku hantu hakiri imibiri y’abazize Jenoside kugira ngo ishyingurwe mu cyubahiro kibakwiriye.

Iki gikorwa cyo kwibuka Abakozi b’Abatutsi 59 bakoreraga Amakomine yahujwe akabyara Akarere ka Musanze, cyaranzwe no kuzirikana amateka, guha icyubahiro abazize Jenoside no kongera gushimangira umuhate wo gukomeza kubaka ubumwe n’ubwiyunge mu Banyarwanda, hagamijwe ejo hazaza heza h’igihugu.