Mu Murenge wa Kinigi, Umuyobozi w’Akarere ka Musanze, Nsengimana Claudien, yatangije ku mugaragaro imurikabikorwa ry’iminsi itatu ry’Abafatanyabikorwa mu Iterambere (JADF) ryiswe "JADF Musanze Open Day", rigamije kugaragaza uruhare rw’abafatanyabikorwa mu guteza imbere imibereho myiza y’abaturage no gushimangira ubufatanye mu rugendo rw’iterambere.

Iri murikabikorwa riyobowe n’insanganyamatsiko igira iti: "Duhurize hamwe imbaraga zose zishyira umuturage ku isonga, we muzi w’iterambere rirambye." Rikaba rihuza inzego za Leta, imiryango itegamiye kuri Leta, amadini n’amatorero, ibigo byigenga n’abandi bafatanyabikorwa berekana ibikorwa n’uruhare rwabo mu iterambere ry’Akarere ka Musanze.

Atangiza iri murikabikorwa, Umuyobozi w’Akarere ka Musanze, Nsengimana Claudien, yavuze ko ari umwanya mwiza wo gusuzumira hamwe intambwe imaze guterwa mu iterambere, kumenya uruhare rwa buri mufatanyabikorwa mu kuzamura imibereho myiza y’abaturage, no kurushaho gushimangira ubufatanye bugamije iterambere rirambye.

Yagize ati: "Uyu munsi ni umwanya mwiza wo kurebera hamwe intambwe tumaze gutera, kumenya uruhare rwa buri mufatanyabikorwa mu kuzamura imibereho myiza y’abaturage no gukomeza gushimangira ubufatanye."

Yakomeje ashimira abafatanyabikorwa bo mu nzego zitandukanye ku ruhare bagira mu gushyira mu bikorwa gahunda z’iterambere, avuga ko umusaruro w’ubwo bufatanye ugaragarira mu mibereho myiza y’abaturage ndetse no mu bikorwa by’iterambere bikomeje kugerwaho mu mirenge yose igize Akarere ka Musanze.

Iri murikabikorwa rya JADF Musanze Open Day riteganyijwe kumara iminsi itatu, rikaba ritanga amahirwe ku baturage yo gusura ibikorwa bitandukanye by’abafatanyabikorwa, kumenya serivisi batanga no kungurana ibitekerezo ku buryo ubufatanye bwakomeza gutanga umusaruro ushyira umuturage ku isonga ry’iterambere. Rytibiriwe n’abafatnyabikorwa 61.