Kuri uyu wa 25/10/2022, mu masaha y'igicamunsi, Umuyobozi w'Akarere Bwana RAMULI Janvier yakiriye Nyakubahwa Guverineri w'Intara y'Amajyaruguru Mme NYIRARUGERO Dancille ari kumwe na bamwe mu bagize inama y'umutekano itaguye y'Intara y'Amajyaruguru RPC CSP Francis MUHETO n'uhagarariye Ingabo Lt Col V. HIGIRO mu Nteko y'Abaturage b'Umurenge wa Kimonyi yateraniye mu Kagari ka Buramira. 

Guverineri w'Intara y'Amajyaruguru  n'Umuyobozi wa Polisi y'Igihugu ku rwego rw'Intara y'Amajyaruguru basabye abaturage: *kubyaza umusaruro no gusigasira ibyagezweho, kubyongera mu bwiza no mu bwinshi, kwirinda amakimbirane n'urugomo, gusigasira umutekano, kurinda abana guta ishuri, gukumira Icyorezo cya EBOLA, kurwanya ibiyobyabwenge, kwirinda ingeso mbi (ubusinzi, kwiyandarika, ubuharike,...), gusigasira umutekano, kwitabira EJO HEZA na MUSA, kuboneza urubyaro,...

Nyuma y'impanuro zatanzwe abaturage nabo bahawe umwanya wo gutanga ibitekerezo no kubaza ibibazo. Ibyabajijwe byahawe ibisubizo ibindi hatangwa inama z'uko byakemurwa kdi abaturage bishimiye ibisubizo n'inama bagiriwe. Ibibazo byabajijwe byibanze ku: ingurane ikwiye ahanyujijwe ibikorwa remezo by'amashanyarazi, Imibereho Myiza (ibyiciro by'Ubudehe) n'amakimbirane ashingiye ku mitungo itimukanwa.

Tuboneyeho kubabwira ko mbere yo kwitabira Inteko y'Abaturage, Guverineri ari kumwe n'Abajyanama b'Intara n'Umunyamabanga Nshingwabikorwa w'Umurenge wa Kimonyi basuye Urwunge rw'amashuri rwa Kitabura rutanga uburezi bw'ibanze bw'imyaka 12 (12YBE). Bari kumwe n'Umuyobozi w'ishuri, hasuwe ibice bitandukanye by'ishuri harebwa ibijyanye n'imyigishirize, gahunda yo kugaburira abana ku ishuri (stock y'ibiribwa, igikoni,...), Isuku,... Hatanzwe inama zo kunoza ibitanoze mu gihe cya vuba kitarenze icyumweru kimwe. Ubuyobozi bw'Ishuri bwavuze ko inama bagiriwe zirahita zishyirwa mu bikorwa.

Muri rusange uruzinduko rwa Nyakubahwa Guverineri mu Murenge wa Kimonyi rwagenze neza. Hashimwe ubwitabire na morali abaturage bagaragaje.