Kuri Tariki 25 Nzeri 2023, Umuyobozi w' Agateganyo w' Akarere ka Musanze  Bwana Hamiss Bizimana afatanyije n' Intumwa ya  MINUBUMWE Bwana Gasana Pascal yatangije ku mugaragaro " URUGERERO RW' INKOMEZABIWWI ICYICIRO CYA 11" 

Insanganyamatsiko y' uyu mwaka iragira iti" DUHAMYE UMUCO W' UBUTORE KU RUGERERO". Iki gikorwa kikaba  cyarabereye mu Murenge wa Busogo kinitabirwa n' Umuhuzabikorwa w' Ibikorwa by' Ubutore mu Karere ka Musanze  Bwana Butunge Pascal,  abaribahagarariye Ingabo, POLICE, abayobozi mu nzego zitandukanye , ababyeyi n' abanyeshuli basoje amashuli yisumbuye.

Muri uyu muhango, Umukozi Ushinzwe guhuza ibikorwa by' Ubutore mu Karere Bwana Pascal Butunge yagejeje ku Rubyiruko ikiganiro cyibanze ku mateka y' Urugerero mu Rwanda n' uruhare rw' Urubyiruko mu kwiyubakira Urwanda twifuza.

Mu ijambo yagejeje ku rubyiruko rutangiye urugerero, Umuyobozi w' Akarere  yabasabye kurangwa n' imico myiza n' imyifatire, kwirinda ubusinzi n' ibiyobyabwenge, gushishikarira umurimo, kugira uruhare runini mu kurwanya amakimbirane yo mu miryango, kurwanya amacakubiri bimakaza ubumwe bw' Abanyarwanda, kwita ku  isuku n' isukura, kwitabira Siporo, gutekereza ku mishinga yababyarira inyungu  ndetse no gushishikariza urundi rubyiruko rutariyandikisha mu kwitabira urugerero kugirango nabo bitabire.