Iyi ni Insanganyamatsiko ikubiyemo ibikorwa bitandukanye byateganijwe muri gahunda y’Icyumweru cy’Umujyanama cyateguwe n’Inama Njyanama y’Akarere ka Musanze, cyatangiye kuwa Mbere tariki ya 23 kigasozwa ku Cyumweru tariki ya 29 Ukuboza 2020.

Iki cyumweru cyaranzwe n’ibikorwa bitandukanye Ibiza ku ku isonga bikaba ari igikorwa cyo gusuzuma aho Akarere kageze gashyira mu bikorwa Imihigo y’uyu Mwaka wa 2020/2021 no kujya gusura ibikorwa hirya no hino mu Mirenge, ibiganiro byabereye mu Nzu Mberabyombi ya CPND de FATIMA, kuwa Gatanu tariki ya 27 Ugushyingo 2020, bihuje Abagize Inama Njyanama ku Rwego rw'Akarere  n'Abaperezida b'Inama Njyanama kuva ku Murenge kugeza ku Kagari, Abanyamabanga Nshingwabikorwa b'Imirenge yose uko ari 15 ndetse n'ab'Utugari 68 tugize aka Karere, yayobowe na Guverineri w’Intara y’Amajyaruguru, Hon.GATABAZI Jean Marie Vianney, n’Umwiherero wabereye mu Karere ka Rubavu kuva kuwa Gatanu tariki ya 27 kugeza ku Ctyumweru tariki ya 29 Ukuboza 2020, watangijwe na Guverineri w’Intara y’Amajyaruguru ugasozwa na Perezida w’Inama Njyanama, Eng.ABAYISENGA Emile, wanitabiriwe n’Abanyamabanga Nshingwabikorwa b’Imirenge yose, Perezida w'Inama Njyanama ku Rwego rw'Umurenge Uhagarariye Abandi n'Abayobozi b'Amashami yose mu Karere.

Abitabiriye umwiherero bunguranye ibitekerezo ishyirwa mu bikorwa ry’imyanzuro y'Umwiherero w'Ubushize (wabereye muri aka Karere kavuzwe haruguru ku itariki ya 20 Mutarama 2020), intege nke zagaragaye  mu Mihigo y'Akarere y'Umwaka Ushize wa 2019/2020 n'ishyirwa mu bikorwa ry'Imihigo y'uyu Mwaka wa 2020/2021, ishyirwa mu bikorwa ry'Ingengo y'Imari na Gahunda y'Itangwa ry'Amasoko , Igishushamnyombonera Gishya cy’Umujyi wa Musanze n’ibyagaragaye muri iki Cyumweru cy'Umujyanama.

Muri rusange, iki cyumweru cyabaye ishuri rikomeye kuri benshi, ubutumwa bwatanzwe muri bwose bwahurizaga ku kwibukiranya ko nta cyagerwaho umuturage atakigizemo uruhare bityo ko bakwiriye kumanuka bakarushaho kubegera, kujya inama no gufata ibyemezo hashingiwe ku byo bemeranijeho. Ibi byose bigashimangirwa no kuba bandebereho mu myitwarire, mu bikorwa, mu kugira ubunyangamugayo no kuvugisha ukuri, kumenya abakiriya bawe, abo ku Rwego rwo hasi n’abo ku Rwego Rwisumbuye, gukora nk’ikipe imwe no guhanahana amakuru yizewe kandi ku gihe.

By’umwihariko, Guverineri w'Intara y'Amajyaruguru akaba yarashimiye byimazeyo aba Bajyanama imikorere n’im ikoranire n’izindi Nzego n’ubufatanye bukomeje kubaranga hagati yabo, ugereranije n’Inama Njyanama z'utundi Turere muri iyi Ntara. Yagize, ati: “N’utundi Turere tubigireho.”

Icyumweru cyasojwe abakigizemo uruhare bose biyemeje kurushaho guhuriza hamwe imbaraga mu gushaka  icyateza imbere Umuturarwanda n'Igihugu muri rusange, Akarere ka Musanze kabigizemo uruhare, hazirikanwa urugamba turiho rwo gukumira ikwirakwizwa ry’Icyorezo cya COVID-19 no kwimakaza umuco w’Isuku n’Isukura mu Muryango Nyarwanda.

Uhereye ibumoso: Umuyobozi w'Akarere, Guverineri na Perezida w'Inama Njyanama y'Akarere

Iyi ni imbaga yari yitabiriye Inama Njyanama kuva ku Karere kugeza ku Kagari

Guverineri yongera gushimira Inama Njyanama anasaba Abayobozi kumenya Abakiriya babo

Bamwe mubitabiriye Umwiherero bafata Ifoto y'Urwibutso