Muri byinshi byiza bikomeje kugezwa ku batuye, ku baturiye, ku bakorera ndetse no ku bagendamu Karere ka Musanze, hiyongereyemo n’Ikigo  cyubatswe na Polisi y’u Rwanda Gishinzwe Kugenzura Ubuziranenge bw'Ibinyabiziga, Ishami rya Musanze, cyatangijwe ku mugaragaro kuri uyu wa Gatanu tariki ya 20 Ugushyingo 2020. Giherereye mu Murenge wa Muhoza, mu Kagari ka Kigombe, mu Mudugudu wa Nduruma, inyuma ya Gare ya Musanze, kikaba gifite ubushobozi bwo kugenzura imodoka magana abiri ku  munsi.

Uyu muhango witabiriwe n'Abashyitsi mu Nzego zitandukanye za Gisivile n'iz'Umutekano barimo Minisitiri w'Ibidukikije, ari na we wari Umushyitsi Mukuru,  Dr.MUJAWAMARIYA Jeanne d'Arc, Guverineri w'Intara y'Amajyaruguru, Hon. GamATABAZI Jean Marie Vianney, Umuyobozi Mukuru Wungirije wa Polisi y'u Rwanda, CP Felix NAMUHORANYE, Umuyobozi w'Ingabo mu Ntara y'Amajyaruguru,  Brig Gen John Bosco RUTIKANGA, Umuyobozi w'Akarere ka Musanze, Madamu NUWUMUREMYI Jeannine, RIB ku Rwego rw'Intara, Abayobozi b'Urugaga rw'Abikorera mu Ntara y'Amajyaruguru no ku Rwego rw’Akarere ka Musanze, Umunyamabanga Nshingwabikorwa w'Umurenge wa Muhoza iki Kigo cyubatswemo, n'abandi.

Mu butumwa bwatangiwe muri uyu muhango, Abayobozi bahurizaga ku kwishimira ibyiza dukesha Ubuyobozi Bwiza buri mu Gihugu cyacu bbokomeje kureberera abaturage muri rusange n'ibi Bigo by'umwihariko.

Nk'uko byatangajwe, ubusanzwe habagaho ikigo kimwe rukumbi giherereye mu Mujyi wa  Kigali, uyu munsi hakaba hatashywe ibigo 3 bicyunganira, byubatswe hashingiwe ku nama no ku mabwiriza ya Nyakubahwa Perezida wa Repubulika, yo kuwa 25 Gashyantare 2019, hagamijwe kwegereza abaturage serivisi nkenerwa, kubungabunga ibidukikije harwanywa ibyuka bihumanya ikirere bitewe n'ibinyabiziga no kugabanya impanuka muri rusange.  

Ibyo bigo ni iki cyafunguwe mu Ntara y'Amajyaruguru, icya Huye mu Ntara y'Amajyepfo n'icya Rwamagana mu Ntara y'Iburasirazuba, bikaba byuzuye bitwaye akayabo ka miriyari eshatu, miriyoni magana ane na mirongo icyenda n’imwe, ibihumbi magana atanu na mirongo itanu na bitatu n’amafaranga magana inani na mirongo icyenda n’ane y’u Rwanda(3, 491, 553, 894RWF).

Minisitiri yabashimiye kuba barashyize mu bikorwa ibyo Nyakubahwa Perezida wa Repubulika yari yaremereye abaturage, abizeza ubufatanye anabemerera imigano yo gutera kuri iki Kigo no mu nkengero zacyo mu rwego rwo kurushaho kubungabunga ibidukukije anatanga ubutumwa ruasange ku bari aho bubahamagarira kurushaho guhangana n'ikwirakwizwa ry'Icyorezo cya COVID-19 agira, ati: "Ntabe Ari Njye Cyangwa Wowe Utuma Igihugu Cyacu Giheranwa na COVID-19."

Iyi gahunda ikaba iziye igihe, kubera ko uko Igihugu kigenda kirushaho gutera imbere ari nako umubare w'ibinyabiziga urushaho kuzamuka kikaba kinafite n‘uyu mwihariko wo gupima ingano y'ibyuka bihumanya ikirere ikinyabiziga gifite.

Polisi isobanurira Abashyitsi imikorere y'iki Kigo