Abikorera bo mu Karere ka Musanze bashyikirije Umuryango wa Ibuka mu Karere ka Musanze, miliyoni 40 Frw, azifashishwa mu bikorwa byo gufasha Abarokotse Jenoside yakorewe Abatutsi batishoboye bo mu Mirenge itandukanye yo mu Karere ka Musanze. 

Iki gikorwacye cyabereye mu muhango wo kwibuka Kwibuka ku nshuro ya 32 Jenoside yakorewe Abatutsi mu 1994, wabereye Ku Rwibutso rwa Jenoside rwa Cour d’Appel de Ruhengeri habereye  kuri uyu wa Kane tariki ya 25 Kamena 2026, wateguwe n’Urugaga rw’Abikorera mu Rwanda (PSF) mu Katrere ka Musanze ku bufatanye na PSF mu Ntara y’Amajyaruguru.

Uyu muhango witabiriwe n’abayobozi batandukanye barimo Guverineri w’Intara y’Amajyaruguru, Maurice Mugabowagahunde, Umuyobozi w’Akarere ka Musanze, Nsengimana Claudien, abayobozi ba PSF ku rwego rw’Intara n’Akarere, abahagarariye IBUKA ku rwego rw’Igihugu n’Akarere ka Musanze, AVEGA Agahozo, abayobozi b’amadini n’amatorero, ndetse n’inzego z’umutekano.

Mu ijambo rye ryo gutanga ikaze, Umuyobozi w’Akarere ka Musanze, Nsengimana Claudien, yihanganishije imiryango y’Abikorera babuze ababo muri Jenoside yakorewe Abatutsi. Yanashimiye Abikorera uruhare bakomeje kugira mu kubaka igihugu, guteza imbere amahoro, ubumwe n’ubwiyunge, ndetse no gushyigikira imibereho myiza y’Abarokotse Jenoside yakorewe Abatutsi, cyane cyane abatishoboye.

Guverineri w’Intara y’Amajyaruguru, Maurice Mugabowagahunde, yasabye Abikorera n’Abanyarwanda muri rusange gukomeza gukora ibikorwa byubaka igihugu, guharanira ko Jenoside itazongera kubaho ukundi, gukomera ku bumwe bw’Abanyarwanda no gukomeza kuba hafi y’Abarokotse Jenoside yakorewe Abatutsi, by’umwihariko abatishoboye.

Uhagarariye Urugaga rw’Abikorera mu Rwanda (PSF) yavuze ko Jenoside yakorewe Abatutsi yatewe n’ubuyobozi bubi bwabibye urwango n’ivangura mu Banyarwanda imyaka myinshi. Yamaganye bamwe mu bikorera bagize uruhare muri Jenoside ndetse n’abayiteye inkunga mu buryo butandukanye, ashimangira ko amateka mabi atagomba kongera kwisubiramo.

Igikorwa cyo Kwibuka ku nshuro ya 32 Jenoside yakorewe Abatutsi mu 1994 cyaranzwe no kunamira no guha icyubahiro Abazize Jenoside yakorewe Abatutsi, ndetse no kongera gushimangira umuhigo wo kurwanya ingengabitekerezo ya Jenoside no gukomeza ibikorwa by’ubumwe, ubwiyunge n’iterambere ririmo no gufasha Abarokotse Jenoside yakorewe Abatutsi bakiri mu buzima bugoye.

Inkunga ya miliyoni 40 Frw yatanzwe n’Abikorera ni ikimenyetso cy’ubufatanye n’ubwitabire bw’urwego rw’abikorera mu rugendo rwo gukomeza gufasha Abarokotse Jenoside yakorewe Abatutsi no kubaka u Rwanda ruzira amacakubiri, rushingiye ku bumwe, ubudaheranwa n’iterambere rirambye.