Kuri uyu wa Kabiri tariki ya 08 Werurwe 2022, u Rwanda rwifatanyije n’Amahanga mu Kwizihiza Umunsi Mpuzamahanga Ngarukamwaka w’Umugore, ku Nsanganyamatsiko igira, iti: “Uburinganire n’Ubwuzuzanye mu Guhangana n’Imihindagurikire y’Ibihe.”

Ku Rwego rw'Akarere ka Musanze, uyu munsi wizihirijwe mu Murenge wa Kinigi, mu Kagari ka Kampanga, mu Mudugudu wa Muhe. Umushyitsi Mukuru yari Hon.Senateri NYINAWAMWIZA Laetitia, waturutse mu Nteko Ishinga Amategeko, wakiriwe n'Umuyobozi w'Akarere, Bwana RAMULI Janvier, Inzego z'Umutekano, CNF ku Rwego rw'Intara n'Akarere n'abandi Bayobozi batandukanye barimo n'Umunyamabanga Nshingwabikorwa w'uyu Murenge wabakiriye.

Uyu muhango wari witabiriwe n’abantu mu Ngeri zitandukanye za Gisivile n'iz'Umutekano, by'umwihariko Abagore n'Abakobwa mu Ngabo z'Igihugu na Polisi y'u Rwanda, Abanyeshuri mu Ishuri Rikuru rya INES-RUHENGERI ndetse na bamwe mu Bakozi ku Karere, bari bakereye kwifatanya n'abaturage bo muri uyu Murenge.

Ibirori nyirizina byabimburiwe no gusura zimwe mu ngo z'abaturage harebwa uko bimakaje umuco w'isuku.

Byakurikiwe no gudsura bimwe mu bikorwa by'abagore byari byamuritswe birimo n'ibyo bafatanya na basaza babo ndetse n’iby’abakobwa babyariye iwabo bize umwuga w’ubudozi.

Nyuma y'aho, Bashyitsi bifatanyije na CNF mu gikorwa cyo kuremera abagore batishoboye, mu rwego rwo kubafasha kugendana n'abandi mu rugamba rw'iterambere n'imibereho myiza, binyuze mu kwishakamo ibisubizo hagamijwe inyungu rusange. Hatanzwe inka 5 n'intama 5, ndetse n'ibiseke by'imyaka.

Impanuro zahatangiwe zahurizaga ku kwifurizanya umunsi mwiza, gushimira Ubuyobozi Bwiza bw'Igihugu cyacu, kugaragaza uruhare rw'umugore mu iterambere, gushimira abaturage ubufatanye bwabo mu guhangana  n'Icyorezo cya COVID-19 cyari cyaraburijemo byinshi birimo n'umunsi nk'uyu, kubasaba kutadohoka mu kwirinda kubera ko kigihari no kurushaho  kubungabunga ibidukikije, nk'uko Insanganyamatsiko ibidukangurira, by'umwihariko ba Mutimawurugo, muri kwa gusigasira agaciro basubijwe n'Intore izirusha intambwe, banaharanira kubyaza umusaruro amahirwe abakikije  mu gushaka icyatuma ibibazo bibangamiye umudendezo wa muntu bikemuka ku buryo burambye.

Mu rwego rwo gutinyura bagenzi babo, bamwe mu bagore n'abakobwa biteje imbere batanze ubuhamya basangiza bagenzi babo inzira banyuzemo n'aho ibagejeje. Akarusho kabaye umukobwa w'imfubyi NYIRANZAYINO Solange, urera abavandimwe be, ubu akaba amaze kwiyubakira "annexes" eshatu.

Nk'uko bisanzwe mu Muco Nyarwanda, ibi birori byaranzwe n'imbyino, indirimbo no gucinya umudiho, bunganiwe n'Itorero ry'Umurenge.

Muri ibi birori kandi, Uretse Hon. Senateri wavuzwe haruguru, Akarere ka Musanze kari kanasuwe n'Abadepite 2 aribo Hon. MPEMBYEMUNGU Winifrida, wifatanyije n'Abaturage bo mu Murenge wa Muko, aho yakiriwe na Perezida w’Inama Njyanama y’Akarere, Bwana  NDAYAMBAJE Michel, na Hon. MUREKATETE Marie Therese, wari mu Murenge  wa Busogo,  wagiye ahsanga Umuyobozi w'Akarere Wungirije Ushinzwe Imibereho Myiza y'Abaturage, Madamu KAMANZI Axelle.