Ni ubutumwa bwagarutsweho n’abayobozi batandukanye bitabiriye siporo rusanjye mu karere ka Musanze. Uyu munsi, tariki ya 18 Mutarama 2026, mu Mirenge yose igize Akarere ka Musanze hakozwe Siporo Rusange yitabiriwe n’Abayobozi n’abaturage mu ngeri zitandukanye. Iyi siporo yaranzwe no kwiruka (Mucakamucaka) no gukora imyitozo ngororamubiri.

Ku rwego rw'Akarere, siporo rusange yabereye mu Murenge wa Muhoza,  yitabirwa na Guverineri w'Intara y'Amajyaruguru Bwana MUGABOWAGAHUNDE Maurice, Umuyobozi w'Akarere ka Musanze Bwana NSENGIMANA Claudien,  Perezida w'Inama Njyanama y'Akarere ka Musanze Bwana NDAYAMBAJE Michel, Umuyobozi w'Akarere wungirije Ushinzwe Imibereho myiza Bwana KAYIRANGA Theobald, Abagize Inzego z'Umutekano, Abaturage biganjemo urubyiruko, barimo n’abanyeshuri mu bigo bitandukanye biri muri uyu murenge.

Ubutumwa bwatanzwe n’abayobozi batandukanye barimo  Guverineri w’Intara n’Umuyobozi w’Akarere bwibanze ku kwibutsa abaturage akamaro ka siporo no kuyigira Umuco, kwitabira amarushanwa Umurenge Kagame Cup, gukomera ku ngamba zo guteza imbere isuku n'isukura n'izo gucunga umutekano, kwirinda ibiyobyabwenge no kwipimisha indwara zitandura.