Kuri iki gicamunsi cyo kuri uyu wa Kane tariki ya 23 Ukuboza 2021, mu Karere ka Musanze habereye Ubukangurambaga buhamagarira Abatwara Abantu n'Ibintu ku Magare bibumbiye muri Koperative CVM kurushaho kubahiriza amabwiriza n'ingamba zo gukumira ikwirakwizwa rya COVID-19 bitabira igikorwa cyo kwikingiza, kugira ngo birinde bo ubwabo, barinde imiryango yabo, abaturanyi, ndetse n'abo baha serivisi.

Iki gikorwa cyateguwe n'Akarere ka Musanze, ku bufatanye n'Ibitaro Bikuru bya Ruhengeri, ku nkunga y'Umufatanyabikorwa WORLD RELIEF, binyuze muri wa Mushinga wayo urimo gukorerwa muri aka Karere mu gihe kingana n'umwaka umwe, witwa "SCOPE COVID- 19".

Cyabereye mu Murenge wa Muhoza, hifashishijwe indangururamajwi ngendanwa, umwambaro n'udupfukamunwa byanditsweho ubutumwa bujyanye n'yi gahunda, aho bahagurukiye ku Biro by'Umurenge wa Muhoza, bakazenguruka mu Mujyi Rwagati wa Musanze, nyuma bakagaruka aho ku Biro by'Umurenge wa Muhoza, ari naho hatangiwe ubutumwa nyirizina.

Ubuyobozi bw'Akarere bukaba bwari buhagarariwe n'Umukozi mu Ishami ry'Ubuzima Ushinzwe Iterambere ry'Ubuzima no Kurwanya Indwara, Bwana BASHIRIJABO Jean Bosco, kubera inshingano zitandukanye zari zahuriranye,  wari kumwe n'Umuhuzabikorwa w'uyu Mushinga mu Karere, Perezida wa CVM n'Umukozi Ushinzwe Ubuzima, Isuku n'Isukura mu Murenge wa Muhoza.

Muri ubu bukanguramabaga bwihariye, Abanyamuryango bose b'iyi Koperative, uko ari 1200, bakaba baraguriwe uyu mwambaro (amajile) n'udupfukamunwa, ariko hakaba hari hitabiriye bamwe muri bo mu rwego rwo kwirinda iki cyorezo.