Kuri uyu wa 30 Nzeri 2022, ku gicamunsi, abakozi b'Akarere bakinnye imikino ya gicuti n'Abapadiri ba Diyosezi Gatolika ya Ruhengeri. Bakinnye imikino ya Volleyball, Basketball na Football. Abagize Komite Nyobozi y'Akarere bose bari kumwe n'abakozi bitabiriye iyi mikino hamwe na Nyir'icyubahiro Mgr Vincent HARORIMANA uyobora Diyosezi ya Ruhengeri.  

Mu mukino wa Volleyball, Ikipe y'Abapadiri Stella VC yatsinze iy'Abakozi b'Akarere amaseti 2 ku busa. Mu mukino wa Basketball, Abakozi b'Akarere batsinze Abapadiri amanota 55 kuri 31 naho mu mukino w'umupira w'amaguru Ikipe y'Abakozi b'Akarere yatsinze iy'Abapadiri ibitego 4 kuri 1.

Iyi mikino yaranzwe n'ishyaka ku mpande zombi. Haba abakinnyi cyangwa abafana, akanyamuneza kari kose. Byari binejeje kubona Abihayimana mu ngeri zitandukanye bakina abandi bafana hamwe n'abakozi bari kumwe n'Abayobozi babo bakinana. Imikino yaranzwe n'ubusanane ku mpande zombi.

Kuri uyu wa 30/09/2022 kandi, mu Karere ka Musanze twizihije umunsi mpuzamahanga w'umutima. Hakozwe ibikorwa byo gupima indwara zitandura NCDs. Mu mikino yahuje abakozi b'Akarere n'Abapadiri ba Diyosezi ya Ruhengeri, ku bufatanye na RBC, Rwanda NCD Alliance na RPSA hatanzwe ubutumwa bukangurira abantu bose kwisuzumisha buri gihe indwara zitandura NCDs. Banakanguriwe kugira umuco wo gukora imyitozo ngororamubiri, kugabanya cg kureka inzoga, kureka kunywa itabi, kureka kurya umunyu mwinshi,... Bashishikarijwe kujya bitabira #CarFreeDay.

Nyuma y'iyi mikino yose yavuzwe haruguru gahunda y'umunsi yasojwe n'ubusabane hagati y'abayobozi n'abakinnyi b'amakipe ku mpande. Hifujwe ko imikino nk'iyi yazongera kubaho mu minsi iri imbere.

KAMANZI Jean Bosco

Ag PRMCO