Ku bufatanye n'Akarere ka Musanze, abagize Ihuriro ry'Abafatanyabikorwa b'Akarere ka Musanze "JADF-Imbarutso" bateguye IMURIKABIKORWA "OPEN DAY". Iri murikabikorwa rizamara iminsi itatu kuva kuwa 30/08/2022 kugeza kuwa 01/09/2022 muri Sitade Ubworopherane. Iri murikabikorwa rifite insanyamatsiko igira iti: "Imbaraga zihujwe, Inkingi ya mwamba mu Cyerekezo cy'Iterambere rya Musanze Twifuza".

Ryafunguwe ku mugaragaro n'Umuyobozi w'Akarere Bwana RAMULI Janvier ari kumwe n'Umuyobozi wa JADF - Imbarutso Bwana MUGABUKOMEYE Benjamin. Nyuma yo gufungura ku mugaragaro iri murikabikorwa, habayeho igikorwa cyo gusura abaje kumurika ibyo bakora buri wese agasobanura ibijyanye na serivisi atanga ku batuye Akarere ka Musanze. Imurikabikorwa ryitabiriwe n'abafatanyabikorwa bagera kuri 54 bafasha abaturage mu byiciro bitandukanye: Ubukungu (ubuhinzi, ubworozi, kurengera ibidukikije, ubukerarugendo...), Imibereho Myiza (ubuzima, uburezi, uburinganire n'iterambere ry'umuryango,..), Imiyoborere Myiza (ubutabera, kurwanya amakimbirane, kurwanya akarengane na Ruswa,...).

Mu gutangiza iri murikabikorwa, Umuyobozi w'Akarere yashimiye abafatanyabikorwa uruhare rwabo mu bikorwa biteza imbere Akarere ka Musanze mu rwego rw'Ubukungu, Imibereho Myiza n'Imiyoborere Myiza. Yashimye imikorere n'imikoranire iranga Akarere n'Abafatanyabikorwa kugeza ubu, aboneraho kubasaba gukomeza kunoza ibyo bakora kurushaho byose mu cyerekezo cyo gufasha Akarere kugira abaturage bifashije, bafite ubuzima buzira umuze, batekanye kandi babanye neza mu miryango yabo n'abaturanyi babo muri rusange. By'umwihariko, yasabye abitabiriye imurikabikorwa gukomeza gufasha Akarere gukemura ibikibangamiye imibereho myiza y'abaturage "Human Security Issues". Yabijeje ubufatanye buhoraho hagati y'ubuyobozi bw'Akarere na JADF - Imbarutso.

Umuyobozi wa JADF - Imbarutso nawe yashimye imikoranire hagati y'Abafatanyabikorwa n'Abikorera. Yasoje yizeza ubuyobozi bw'Akarere ka Musanze kuzakomeza kuba imbarutso y'iterambere ku batuye Akarere ka Musanze.Kugeza ubu, abafatanyabikorwa b'Akarere ka Musanze muri uyu mwaka w'Ingengo y'imari wa 2022/2023 agaciro k'ibyo bateganyije kuzakora ni Miliyari eshanu na Miliyoni magana atanu y'u Rwanda. Imihigo irakomeje.

KAMANZI Jean Bosco

Ag PRMCO