Kuri uyu wa 31 Ukwakira 2025, Umuyobozi w’Akarere Wungirije Ushinzwe Imibereho Myiza y’Abaturage Bwana Kayiranga Theobald yakiriye Itsinda ry'Abadepite batatu babarizwa mahuriro atandukanye ariyo ihuriro ry'Abanyarwandakazi mu Nteko Ishingamategeko (FFRP) n’Ihuriro ry'Abagize Inteko Ishinga Amategeko baharanira Imibereho myiza y'Abaturage n'Iterambere (RPRPD), basuye Akarere ka Musanze.

Abadepite basuye Akarere ni Depite Uwingabe soalange, Depite MUYANGO MUKAYIRANGA Sylvie na Depite MVANO NSABIMANA Etienne. Bari mu ruzinduko rw’iminsi ibiri mu Karere ka Musanze muri gahunda y’ubukangurambaga ku kumenyekanisha Itegeko rigenga abantu n’umuryango, kwitabira serivisi zijyanye n’ubuzima bw’imyororokere no kwirinda inda zitateganyijwe mu rubyiruko.

Ku cyicaro cy’Akarere, baganiriye n’abayobozi n’abakozi mu byiciro bitandukanye ku ngamba zijyanye no kumenyekanisha Itegeko rigenga abantu n’umuryango, kwitabira serivisi z'ubuzima bw’imyororokere no kwirinda inda zitateganyijwe mu rubyiruko. Nyuma yo kwakirwa na Bwana Kayiranga Theobald, bagaragarijwe ishusho rusanjye y'ikibazo cy'inda zitateganyijwe mu rubyiruko n'ingamba zihari zo gukumira inda zitateganijwe mu bangavu no mu rubyiruko muri rusange.

Nyuma yo kungurana ibitekerezo, Abadepite basuye Isange OSC y’Ibitaro bya Ruhengeri, basobanurirwa serivisi zihatangirwa mu gufasha abahohotewe, baganira ku mitangire y'amakuru ku basambanya abana n'ihohoterwa rikorerwa mu miryango n’icyakorwa ngo ihohoterwa ricike burundu.

Basuye kandi n'Ikigo Nderabuzima cya Muhoza, basobanurirwa uko urubyiruko rwitabira Serivisi zijyanye n'ubuzima bw'imyororekere zitangirwa mu cyumba cyabahariwe (Youth Corner). 

Umunsi wambere w’uruzinduko rw’abadepite mu Karere ka Musanze wasojwe n’inama bagiranye n’Abaturage b’Umurenge wa Muhoza. Muri iyi nama, abadepite bibanze ku gusobanurira abaturage itegeko Itegeko rigenga abantu n’umuryango.